29 أبريل 2008

مبروك.. آسفة.. شكراً



مصاعيبو

ابني وأخويا الصغير حلاوة.

أولا

مبروك على أول فرحة... ويا رب يا رب كل حياتك تبقى كده، وقلبك يفضل فرحاااااان على طول.

ثانيا

آسفة اني مقدرتش أحتفل معاكم ، وأفرح بيك وبأميرتك، لكن انت عارف... وأنا كمان عارفة انك مش زعلان.

ثالثا

بجد شكرا شكرا شكرا على انك قربتني من أحلى إنسانة في حياتي (مش هقول هي مين لحسن نتحسد، الحكاية مش ناقصة، كفاية هي عارفة نفسها)، ربنا يبارك لي فيكو يااااااااااااا رب.

03 أبريل 2008

بايني كبرت


لم أصل بعد إلى منتصف الديوان.. ولكنني لم أستطع أن أتمالك نفسي وسأكتب عنه حاااالا

الديوان هو "بايني كبرت" لزميلنا الشاعر الرائع أحمد عبيد.. بالأمس وجدت نسخة منه على مكتبي وعليها إهداء لشخصي المتواضع.. أخذت الديوان وأنا متأكدة أنه أكثر من رائع لأنني قرأت أشعار عبيد انبهرت بها من قبل، ولكن ما قرأته فاق بحق كل توقعاتي...

ما افتكرش زمان في عمري
كنت أصدق إني عيل
كنت قزعة
بس حاسس إني شخص ما هوش قليل
كنت شايف إني راجل
حلمي خاص جدا وعاجل
كنت أشوف صورتي في عيونهم
إني عيل
شيء يحير
وإن قالوا لي في يوم هتكبر
كنت أقول أنا مش صغير

ما فعله أحمد عبيد بي بديوانه لم يفعله أحد من قبله، لا شاعر ولا راوي ولا قاص.. لقد أجبرني على هجر رواية لنجيب محفوظ، وما أدراكم ما عشقي لكل حرف خطه هذا الرجل، لأصادق ديوانه وتأبي يداي أن تتركه وتأبي عيني أن تغمض قبل أن تلتهم قصيدة وراء أخرى وتنهمر دموعها رغما عني، ليس حزنا ولا شجنا ولكن ا س ت م ت ا ع ا !!!!!

لما أول مرة قلبي
جه ودق في إعدادية
كنت شايف نفسي فارس
والأميرة دي تبقى هي
وأبني بيت لينا ف خيالي
وأبتكر
أسماء عيالي
كنت أشوف صورتي في عيونهم
إني عيل
شيء يحير
وإن قالوا لي ده لما تكبر
كنت أقول
أنا مش صغير

منذ فترة ليست بالقليلة توقفت عن الاستمتاع بشعر العامية، أصبحت أشعر بأنه في كثير من الأحيان "استظراف" و"فهلوة" أو ربما لأن أذني تم تشفيرها على يد التونسي وجاهين والأبنودي ونجم.. وجاء أحمد عبيد ليفك الشفرة وينقلني لأيام زمااااان.

الغريبة
لما مرت
لحظة لحظة
سنين صبايا
لما صرت لابد أوطي
لجل أسرح في المراية
سرسبت ضحكة طفولتي
لما نسيتها الملامح
والمشاغل
غصب عني
سكنت القلب اللي طامح
حن قلبي لأياميها
روحي راحت تشتهيها
نفسي انام على حجر أمي
وأركب السلم حصان
نفسي العب بره حافي
والا أشاغب في الجيران
نفسي أصرخ "آه كفاية"
اللي شايله ده مش قليل
بس خايف من سؤالهم
إنت راجل ولا عيل ؟

الديوان نشره المجلس الأعلى للثقافة ضمن سلسلة الكتاب الأول.. نصيحة لله.. لا تفوت على نفسك هذه المتعة وسارع بقراءته...

إنتو مش شايفين حقيقتي
مش ملامحي
ومش ده سني
اللي باين مني ليكم
وش لابسه أنا غصب عني
شاب لسة في عشريناته
شكله عدى الأربعين
بس شايل
بين ضلوعه
قلب طفل عشر سنين

30 ديسمبر 2007

بموت في دباديبك !


سؤال أهبل قوي خطر على بالي انهارده الصبح.. ليه لما واحد بيحب واحدة قوي، أو العكس، بيقولها "بموت في دباديبك".. ويعني ايه دباديبك أصلا؟

هو ممكن تكون دباديب دي جمع دبدوب.. وعلشان كده الناس لما بيسيبوا بعض بيرجعوا الصور والجوابات والدباديب..

المشكلة الوحيدة في التفسير ده إن الكلمة دي من زمان، وزمان مكانش فيه دباديب

ياللا اللي عاوز يهيس وعنده تفسير يكتبه...

26 نوفمبر 2007

أحلى الأوقات


تفاصيل صغيرة.. ولكنها تدخل على القلب أكبر سعادة

أوقات قصيرة.. ولكن ذكراها تمتد عمرا بأكمله

أناس قليلون.. ولكنهم بسكان العالم كله

رغم أن الحياة لا تخلو من "فصولها البايخة".. إلا إنني أعتقد أننا نستطيع استعادة السعادة التي نفتقدها.. تلك السعادة الهادئة، غير المتشنجة، التي تتسلل لتحتل مساحة أكبر من روحك كل دقيقة تقضيها من هذه الأوقات الحلوة

عشر دقايق (رغي بنات) بعد صلاة العصر
شوبينج في سيتي ستارز، وصرف حتى الإفلاس التاااام
بولة آيس كريم في لسعة البرد الخفيفة
كيكة بالشوكولاته السخنة.. وأكل حتى الإغماء
غطس في البحر (بهدومك) وسط (شلة) مجانين

والأهم والأروع من هذا كله أن تشعر أن وجودك يشكل فارقا في حياة بعض الناس.. وأنك تستطيع ببعض اللمسات أن تدخل على قلوبهم بعض السعادة.

كلام غير مرتب ؟ أعرف ذلك.. ولكنني أيضا أعرف أنكم تفهمونه.. وتشعرون به

13 سبتمبر 2007

الفرحة معدية


أن تكون قادرا على أن تفرح... شيء رائع
ولكن الأروع منه هو أن يكون في حياتك أناس تفرح لهم.. ويفرحون لك.
والأكثر روعة هو أن يرضى الله عنك فيمن عليك بالمزيد من هؤلاء الناس

يا رب فرحنا وفرح من نحب أكثر وأكثر.. وانقل عدوى فرحنا إلى كل مهموم

12 يوليو 2007

رنة موبيلي



"أنا بتنفس حرية.. لا تقطع عني الهوا"
هكذا تشدو الرائعة جوليا بطرس كلما فكر أحدهم أن "يعبرني" بمكالمة تليفون.. ومع أن الكثيرين يرون أن رنة محمولي تلك مفزعة بسبب المدخل الموسيقي القوي، والكلمات الثورية.. إلا أنني أرفض تغييرها بشدة. فهذه الكلمات السبعة التي تقولها جوليا في كل "رنة" هي ببساطة أهم مبادئي في الحياة !!

نعم أتنفس حرية.. فعلا وليس كلاما، وبدون أي شعارات ولا تقمص لدور هدى شعراوي، يعني ببساطة من غير حريتي (يبقى الله يرحمني ويحسن إليا)...

كل شيء رائع في الحياة بدون حرية يتحول إلى جحيم.. الحب يصبح سلسلة من قيود الغيرة، (على الحبيب، ومنه في أحيان كثيرة !).. وتنتقل دبلة الزواج من إصبعك إلى رقبتك لتخنقك بكل قوتها.

الصداقة هي الأخرى بدون حرية أكبر عذابات الحياة.. نعم يمكن للصداقة أن تخنقك إذا أصر صديقك على أنك ملكه وحده دون سواه، وعندما تبدأ في سماع عبارات على شاكلة "انت بقالك 3 أيام مسألتيش عليا"، "ازاي أعرف أخبارك من بره".. أو عندما يتحول الصديق إلى وصي يشعرك دوما أنك مخطئ في حق نفسك.. وحقه بالطبع...

أهلك.. لو قرروا أن يتملكوك فقد فقدوك إلى الأبد.. عملك لو سلبك حريتك (يبقى قلته أحسن)، كتبك لو قرأتها من أجل بحث أو دراسة فلا يبقى منها في ذاكرتك حرف، ولو قرأتها بحريتك لن تغادر وجدانك حتى الموت...

قس على ذلك كل شيء في الحياة.. لذلك وبكل بساطة فقد قررت ألا أظلم حريتي، ولا أفعل إلا ما يحلو لي.. لن أحب غيور، لن أصاحب وصيا، لن أقرا لغير متعتي، لن أغير رنتي.. ولا اسم مدونتي......

14 يونيو 2007

الغالي.. والغاليين


كان لازم طبعا أول تدوينة تكون عنك.. لأنك ببساطة أغلى حاجة في حياتي.. صحيح حياتي مليانة ناس بحبهم وبيحبوني لكن انت حاجة تانية خااااااالص..

استنوا.. اوعوا تفكيركم يروح لبعيد.. لأن "الغالي" اللي بتكلم عنه هو.. عشرينات...

عشرينات لمن لا يعرف هو موقع إلكتروني خاص بالشباب العربي، يهتم بقضاياهم ويتكلم بلغتهم ويهدف لأن يكون بيتهم على الانترنت.. أما بالنسبة لي فعشرينات بيت.. بيتي، وناسه أهلي..

عن عشرينات وأهله.. نتكلم...

أحمد زين.. مع إني بتغاظ منه في حاجات كتييييييييير، بس مكانته عندي صعب قوي تتقارن بحد.. أستاذي في حاجات كتييير، قائد بكل معني كلمة قائد. مش عارفة ليه كل ما بتكلم مع احمد زين بحس إني بكبر.. بجد بكبر قوي...

أحمد نصر.. ياااااااه ده والنبي يتقال عنه ايه.. أكتر واحد على ظهر هذه البسيطة بفرح لما بشوفه، بحس ان شعاع حياة وحماس اتنقل لي فورا.. كنت زمان بتريق على حنان "زوجته" لما بتقول عنه انه ملاك.. بس بجد أحمد نصر فعلا ملااااااك...

ياسو.. حبيبة قلبي وروحي، وصاحبتي العاقلة :) أكتر واحدة في الدنيا بستمتع بصحبتها، صحيح بنقضيها أكل وضحك لحد ما يبقى هيغم علينا، بس بجد الدقيقة مع ياسمين أغلى بكتير من السنة مع أي حد تاني.. من فترة كنت بتكلم مع حد عن يسر "حبيبتي حبيبتي حبيبتي" وبقول إن غلاوتها من غلاوة ياسمين، فلكم أن تتخيلوا حد بحبه كل هذا الحب، وغلاوته جزء من غلاوة حد تاني، يبقى الأصل إيه بالنسبة لي؟ بحبك قوي يا ياسو...

علي.. قدري.. في الكلية ألاقيه، في حفلة التخرج ألاقيه، في الشغل ألاقيه، أفتح الحنفية ألاقيه.. مش ممكن :) أخويا بكل معنى الكلمة، ياااااااما وقف جمبي في حاجات كتير.. واحنا برضه يعني قمنا معاه بالواجب وهاديناه بمريومة، صاحبتنا الشيك، والمرجع الأول في أسماء الماركات والبارفانات والشوكالاته.

رانيا.. الوحيدة بين صاحباتي اللي مستحيل تروح بعد الدنيا ما تضلم :) أطيب القلوب، بتزعل بسرعة وتصفى بسرعة، وأهم حاجة إنها مامة "حبيبة" حبيبة قلوبنا.. وثالثهم أحمد قطب صديقنا المثقف، ورفيق العمودي وأبو رامز، واحد من أرقى وأنقى من رأيت في حياتي..

محمد المعتصم.. يا باااااااااي أغلس واحد في تاريخ البشرية، بس أغلى واحد عندي في عشرينات.. هو أخويا الصغير وصاحب أخويا الصغير، اسمه محمد وأخويا كمان اسمه محمد، والاتنين بحبهم جدا وبتغاظ منهم جدا جدا جدا...

هوبة، الشهيرة بهبة الله أحمد زين، بنت أخت أحمد زين، تبنيتها وحبيتها من أول يوم جت فيه عشرينات، ودلوقتي بحاول أقوم بدوري واتبنى زياد ابنها، لكن للأسف مش عارفة لأن زياد جمهوره كبير، والناس بتحجز قبلها باسبوع علشان تلعب معاه شوية :)

دودو، دعاء الشامي، مش عارفة ليه بفرح قوي لما بشوف دعاء فرحانة، صحيح أنا بحب دعاء جدا بس ده مش سبب كافي علشان أحس قوي كده بإني فرحانة لفرحها وزعلانة لزعلها، مش عارفة يمكن السبب إحساسي بالذنب علشان كنت أحد عوامل تدبيسها في براء :) بجد الثنائي ده أنا بحبه جدددددددددددا، ورغم إن براء واحد من أكتر الناس اللي بتخانق معاهم، إلا انه برضه واحد من أكتر الناس اللي بحبهم، واللي فخورة بإني قابلتهم.. اوعي تزعل مني يا بيرو.. انت عارف إنك غالي عندي :)

مصاعيبو.. أخويا الصغير حلاوة :) مش هينفع أقول له الكلام اللي سمعه كتير عن إنه من أروع الشخصيات في هذا العالم، وإنه لا يختلف عليه إثنين، وإن كنت مؤيدة لكل ده.. مصعب بجد جميل قوي من جوا، ونفسه يبقى سعيد، وأنا نفسي الأيام تجري بسرعة ومصعب يلاقي نفسه عايش جوا حلمه، وحاسس بالرضا من غير طموحه ما يقف لحظة.
ناقص حاجة هو عارفها وكل الناس عارفاها، إن مصعب عبقري عشرينات، ومستقبله الباهر هيكون أكتر بكتير من قدرتي أو قدرة أي حد على التخيل.
بالنسبة لي مصعب رغم انه مش بيتكلم كتير، لكنه من أكتر الناس اللي بتحس بغيرها.. وعموما كفاية عليه انه أخو البوي فريند بتاع... آآآآ ولا بلاش خللي الطابق مستور أحسن :)

منى حبيبة قلبي بجد، وأقرب شخصية لقلبي وعقلي، رغم انه ميبانش لحد إننا قريبين لبعض، منى تقدر تختصرها في كلمة واحدة: "شخصية محترمة". يمكن في وقت من الأوقات كنت فاهمها غلط لعوامل كتير.. لكن انهار ده لازم أقول لها إني بحبها قوي وبحترمها قوي قوي قوي.. ربنا يسعدك يا منى ويريحك من دماغك اللي تاعباكي، ويريح مديرتك من دماغها اللي تاعباها :)

مروة.. البنت دي أكييييد مكانها مش عشرينات، لازم تكون في حضانة أطفال، تقول لها كلمة حلوة تفرح على الآخر، تقول لها كلمة تزعلها تتقمص على الآخر.. نقية إلى درجة السذاجة.. مجتهدة ودؤوبة.. ربنا يوفقك يا مروش، ويتوب عليكي بقى من حكاية بوستر وأعدوا :)

هواري.. نافذتنا على العالم الآخر، وستايل جديد على فريق عشرينات، بس بجد هواري طيب طيب طيب إلى أبعد الحدود، ويستاهل يكون أسعد واحد في الدنيا، وأنا متأكدة إنه إن شاء الله هيكون كده.. عيش يا هواري وسيبك من النكد، مفيش حاجة تستاهل...

فاروق.. محمد فاروق ده كارثة من كوارث الزمن.. أكتر واحد بيضحكني لما بيقعد يسمع إفيهات الأفلام القديمة.. وساعة الجد محترم ودؤوب ومخلص، وهو أكتر واحد بيشاركنا الأمل والطموح لحبيبنا عشرينات.. بجد من ساعة محمد ما انضم لفريقنا وأنا حاسة إني مطمنة على الموقع.

عبد الله الطحاوي.. إله البكش عند الفراعنة "الإفيه خاص بمحمد مصطفى".. عبد الله الطحاوي بيشتغل شغل المحترفين بنفسية الهواة.. مش عارفة ده عيب ولا ميزة، بس كل اللي أعرفه إن أستاذنا من أرق خلق الله على الإطلااااااااااق...

روزا.. مش هكتب عنك آخر واحدة لأنك أحدث عضو في عشرينات، ولكن لأني فعلا عاوزة أختم بيكي علشان يبقى الختام مسك. روزا على فكرة هي رضوى، صديقتي من 6 سنين، وواثقة ان شاء الله إنها هتفضل صديقتي الصدوقة على طول.. من كام يوم كنت بتكلم مع حد وكان بيقول لي اننا بنختبر كل صديق عند درجات حرارة مرتفعة، وفعلا رضوى هي أكثر من تعرض معي لمشكلات ومآسي كانت كفيلة بأن تفسد علاقة بين أختين، لكن الحمد لله صداقتنا أدهشتنا وصمدت رغم كل شيء.. ربنا يخليكي ليا يا روزا ياااااا رب...
ياللا آسفة اني طولت عليكو ، ولا آسفة ليه صحيح، ما هي مدونتي، وبكتب فيها على حريتيييييييييييييييييييي