١٤ يونيو ٢٠٠٧

الغالي.. والغاليين


كان لازم طبعا أول تدوينة تكون عنك.. لأنك ببساطة أغلى حاجة في حياتي.. صحيح حياتي مليانة ناس بحبهم وبيحبوني لكن انت حاجة تانية خااااااالص..

استنوا.. اوعوا تفكيركم يروح لبعيد.. لأن "الغالي" اللي بتكلم عنه هو.. عشرينات...

عشرينات لمن لا يعرف هو موقع إلكتروني خاص بالشباب العربي، يهتم بقضاياهم ويتكلم بلغتهم ويهدف لأن يكون بيتهم على الانترنت.. أما بالنسبة لي فعشرينات بيت.. بيتي، وناسه أهلي..

عن عشرينات وأهله.. نتكلم...

أحمد زين.. مع إني بتغاظ منه في حاجات كتييييييييير، بس مكانته عندي صعب قوي تتقارن بحد.. أستاذي في حاجات كتييير، قائد بكل معني كلمة قائد. مش عارفة ليه كل ما بتكلم مع احمد زين بحس إني بكبر.. بجد بكبر قوي...

أحمد نصر.. ياااااااه ده والنبي يتقال عنه ايه.. أكتر واحد على ظهر هذه البسيطة بفرح لما بشوفه، بحس ان شعاع حياة وحماس اتنقل لي فورا.. كنت زمان بتريق على حنان "زوجته" لما بتقول عنه انه ملاك.. بس بجد أحمد نصر فعلا ملااااااك...

ياسو.. حبيبة قلبي وروحي، وصاحبتي العاقلة :) أكتر واحدة في الدنيا بستمتع بصحبتها، صحيح بنقضيها أكل وضحك لحد ما يبقى هيغم علينا، بس بجد الدقيقة مع ياسمين أغلى بكتير من السنة مع أي حد تاني.. من فترة كنت بتكلم مع حد عن يسر "حبيبتي حبيبتي حبيبتي" وبقول إن غلاوتها من غلاوة ياسمين، فلكم أن تتخيلوا حد بحبه كل هذا الحب، وغلاوته جزء من غلاوة حد تاني، يبقى الأصل إيه بالنسبة لي؟ بحبك قوي يا ياسو...

علي.. قدري.. في الكلية ألاقيه، في حفلة التخرج ألاقيه، في الشغل ألاقيه، أفتح الحنفية ألاقيه.. مش ممكن :) أخويا بكل معنى الكلمة، ياااااااما وقف جمبي في حاجات كتير.. واحنا برضه يعني قمنا معاه بالواجب وهاديناه بمريومة، صاحبتنا الشيك، والمرجع الأول في أسماء الماركات والبارفانات والشوكالاته.

رانيا.. الوحيدة بين صاحباتي اللي مستحيل تروح بعد الدنيا ما تضلم :) أطيب القلوب، بتزعل بسرعة وتصفى بسرعة، وأهم حاجة إنها مامة "حبيبة" حبيبة قلوبنا.. وثالثهم أحمد قطب صديقنا المثقف، ورفيق العمودي وأبو رامز، واحد من أرقى وأنقى من رأيت في حياتي..

محمد المعتصم.. يا باااااااااي أغلس واحد في تاريخ البشرية، بس أغلى واحد عندي في عشرينات.. هو أخويا الصغير وصاحب أخويا الصغير، اسمه محمد وأخويا كمان اسمه محمد، والاتنين بحبهم جدا وبتغاظ منهم جدا جدا جدا...

هوبة، الشهيرة بهبة الله أحمد زين، بنت أخت أحمد زين، تبنيتها وحبيتها من أول يوم جت فيه عشرينات، ودلوقتي بحاول أقوم بدوري واتبنى زياد ابنها، لكن للأسف مش عارفة لأن زياد جمهوره كبير، والناس بتحجز قبلها باسبوع علشان تلعب معاه شوية :)

دودو، دعاء الشامي، مش عارفة ليه بفرح قوي لما بشوف دعاء فرحانة، صحيح أنا بحب دعاء جدا بس ده مش سبب كافي علشان أحس قوي كده بإني فرحانة لفرحها وزعلانة لزعلها، مش عارفة يمكن السبب إحساسي بالذنب علشان كنت أحد عوامل تدبيسها في براء :) بجد الثنائي ده أنا بحبه جدددددددددددا، ورغم إن براء واحد من أكتر الناس اللي بتخانق معاهم، إلا انه برضه واحد من أكتر الناس اللي بحبهم، واللي فخورة بإني قابلتهم.. اوعي تزعل مني يا بيرو.. انت عارف إنك غالي عندي :)

مصاعيبو.. أخويا الصغير حلاوة :) مش هينفع أقول له الكلام اللي سمعه كتير عن إنه من أروع الشخصيات في هذا العالم، وإنه لا يختلف عليه إثنين، وإن كنت مؤيدة لكل ده.. مصعب بجد جميل قوي من جوا، ونفسه يبقى سعيد، وأنا نفسي الأيام تجري بسرعة ومصعب يلاقي نفسه عايش جوا حلمه، وحاسس بالرضا من غير طموحه ما يقف لحظة.
ناقص حاجة هو عارفها وكل الناس عارفاها، إن مصعب عبقري عشرينات، ومستقبله الباهر هيكون أكتر بكتير من قدرتي أو قدرة أي حد على التخيل.
بالنسبة لي مصعب رغم انه مش بيتكلم كتير، لكنه من أكتر الناس اللي بتحس بغيرها.. وعموما كفاية عليه انه أخو البوي فريند بتاع... آآآآ ولا بلاش خللي الطابق مستور أحسن :)

منى حبيبة قلبي بجد، وأقرب شخصية لقلبي وعقلي، رغم انه ميبانش لحد إننا قريبين لبعض، منى تقدر تختصرها في كلمة واحدة: "شخصية محترمة". يمكن في وقت من الأوقات كنت فاهمها غلط لعوامل كتير.. لكن انهار ده لازم أقول لها إني بحبها قوي وبحترمها قوي قوي قوي.. ربنا يسعدك يا منى ويريحك من دماغك اللي تاعباكي، ويريح مديرتك من دماغها اللي تاعباها :)

مروة.. البنت دي أكييييد مكانها مش عشرينات، لازم تكون في حضانة أطفال، تقول لها كلمة حلوة تفرح على الآخر، تقول لها كلمة تزعلها تتقمص على الآخر.. نقية إلى درجة السذاجة.. مجتهدة ودؤوبة.. ربنا يوفقك يا مروش، ويتوب عليكي بقى من حكاية بوستر وأعدوا :)

هواري.. نافذتنا على العالم الآخر، وستايل جديد على فريق عشرينات، بس بجد هواري طيب طيب طيب إلى أبعد الحدود، ويستاهل يكون أسعد واحد في الدنيا، وأنا متأكدة إنه إن شاء الله هيكون كده.. عيش يا هواري وسيبك من النكد، مفيش حاجة تستاهل...

فاروق.. محمد فاروق ده كارثة من كوارث الزمن.. أكتر واحد بيضحكني لما بيقعد يسمع إفيهات الأفلام القديمة.. وساعة الجد محترم ودؤوب ومخلص، وهو أكتر واحد بيشاركنا الأمل والطموح لحبيبنا عشرينات.. بجد من ساعة محمد ما انضم لفريقنا وأنا حاسة إني مطمنة على الموقع.

عبد الله الطحاوي.. إله البكش عند الفراعنة "الإفيه خاص بمحمد مصطفى".. عبد الله الطحاوي بيشتغل شغل المحترفين بنفسية الهواة.. مش عارفة ده عيب ولا ميزة، بس كل اللي أعرفه إن أستاذنا من أرق خلق الله على الإطلااااااااااق...

روزا.. مش هكتب عنك آخر واحدة لأنك أحدث عضو في عشرينات، ولكن لأني فعلا عاوزة أختم بيكي علشان يبقى الختام مسك. روزا على فكرة هي رضوى، صديقتي من 6 سنين، وواثقة ان شاء الله إنها هتفضل صديقتي الصدوقة على طول.. من كام يوم كنت بتكلم مع حد وكان بيقول لي اننا بنختبر كل صديق عند درجات حرارة مرتفعة، وفعلا رضوى هي أكثر من تعرض معي لمشكلات ومآسي كانت كفيلة بأن تفسد علاقة بين أختين، لكن الحمد لله صداقتنا أدهشتنا وصمدت رغم كل شيء.. ربنا يخليكي ليا يا روزا ياااااا رب...
ياللا آسفة اني طولت عليكو ، ولا آسفة ليه صحيح، ما هي مدونتي، وبكتب فيها على حريتيييييييييييييييييييي

هناك ٢١ تعليقًا:

مُصْعَب إِبْرَاهِيم يقول...

مش عارف أقول ايه...

وبرغم الضغظط اللي علي وجنبي من شخص خنيق لابس أحمر إلا إني هأقول اللي جوايا بكل جرأة...\

هو ايه بقى؟!

مش عارف..
بس هو كبير


ربنا يكرمك يا شيرين
ربنا يكرمك يا ست الريسة على رأي الشخص الخنيق اللي لابس أحمر وواقف جنبي بيضغط عليّ!!


مش عارف أشكرك ازاي والله

مُصْعَب إِبْرَاهِيم يقول...

مش عارف أقول ايه...

وبرغم الضغظط اللي علي وجنبي من شخص خنيق لابس أحمر إلا إني هأقول اللي جوايا بكل جرأة...\

هو ايه بقى؟!

مش عارف..
بس هو كبير


ربنا يكرمك يا شيرين
ربنا يكرمك يا ست الريسة على رأي الشخص الخنيق اللي لابس أحمر وواقف جنبي بيضغط عليّ!!


مش عارف أشكرك ازاي والله

قضية عم أحمد Ahmed Case يقول...

بسم الله الرحمن الرحيم
اولا بوست متواضع وينقصة كثير من الجوانب الموضوعية مش عايز اقيم ادائك دلوقتي كصحفية ينقصها كثير من خبرات الحياة بس أحب اقولك اني نسيتي حد هم مشتغلش في عشرينات بس لو سألتي اي عيل صغير عنه هيقولك هو مين زاي حد كبير هيقوم يقف ويقولك هو مين .

أحمد رفعت
إانسان مهذب ابن ناس أوي مؤدب جدا حبوب جدا بجد فرق كتير جدا مع عشرينات بعد اما اتنقلوا ايران ربنا يكرمه .

بجد يا شرين كل من ذكرتي انشان اعتز بمعرفتهم جدا واجبهم كثيرا واقدرهم جدا .

بوست رائع يا ست الريسه

ويجعلة عامر

محمد السيد..مش حاسكت يقول...

التعليقات دي نزلت إمتي ؟؟


ولا البوست ده اساسا اتكتب إمتي ؟؟؟


أنا لسة فاتح المدونة من شوية ... ويادوب عقبال ما علقت في أول موضوع ... بأرجع للرئيسية لقيت الكلام ده ...


بالراحة شوية علينا يا أستاذة .....

محمد السيد..مش حاسكت يقول...

لا تعليق ...


أجمل حلم وأجمل مكان .. وأجمل موقع ... وأكتر مكان بأرتاح فيه علي النت ....


عشرينات .....

لو حأفضل أوصف ولا أحكي عنه للصبح مش حأعرف ...ولا حأخلص ....

عشرينات بالناس اللي فيه ...

أنا بقي لي 6 سنين في القاهرة .. محبتش حد هناك قد ماحبيت عشرينات .. والناس اللي فيه ....

مفكرتش مرة إني اسافر لحد مخصوص ... أو أحضر حتي حفلة في القاهرة ... غير حفلتكم في النقابة ...

يومها كانت أول مرة أقابلكم هناك ... وكانت عزومة العشا لو فاكرة حضرتك ...

يومها رحت لمصعب معرفنيش الأول وبعدها عرفني بهواري ودعاء والباقيين ....

وانتو ماشيين حد نادي عليكي وقال لك محمد السيد بتاع "لا للتمديد..... " ...

الصراحة كان نفسي أكمل معاكم اليوم ... وفعلا هواري ومصعب عرضوا أتعشي معاكم أنا ويحيي ...


مش عايز أطول ...

بس كفاية إن كل معارفي اللي هنا في إسكندرية عارفين قد إيه عشرينات غالي عليا ...

شيرين ...زين ... نصر ... البراء...المعتصم ... الدسوقي ... مصعب ... هواري ... الطحاوي ... مروة ... روضة ... هبة الله .. عجم ... ياسر ... وأخيرا وليس آخرا مني سليم ...


شكرا جزيلا
اللهم كما جمعتنا في الدنيا فاجمعنا جميعا في جنات النعيم

شيرين يقول...

ميرسي ميرسي ميرسي يا ولاد.. مش عاوزة هتاف خاص عاوزة هتاف عام :)

لا بجد شكرا جدا انكم اهتميتوا وعلقتوا...

مصاعيبو متقولش حاجة.. كل اللي عاوز تقوله واصل، وابقى سلم لي على صاحبك الخنيق وقل له بلاش الأحمر، مش كفاية علينا الأخضر

أحمد رفعت الشهير ب... ولا بلاش.. المهم يا سيدي أنا لم أنسى الأستاذ الدكتور الوزير أحمد رفعت.. وإن شاء الله الدور على تنمية الأعمال بعد عشرينات، وانت وأخوك رامي إيمان ليكو عندي تدوينة مخصووووووووصة

محمد السيد.. بجد شكرا شكرا شكرا شكرا على وجودك هنا.. وعشرينات كله، بيعتز جدددددددا بانك واحد من ناسه.. ويا رب دايما نكون مجتمعين في الخير.. ربنا يوفقك يا محمد يا رب

ام مليكة يقول...

هههههههههه مسخرة يا شيري بجد ايه الحلاوة دي يا ست المديرة بجد مت من الضحك على كلامك ولو انك تقمصتي شخصية استاذ عبد الله شوية بس يلا فيه بعض الموضوعات محتاجة الحس الفني الجامد ده تسلم يدك يا شيري انا فرحانة قو يانك دخلتي عالم التدوين اخيراااااا

MariumaZ يقول...

تتصوري بقى يا شيرين على قد ما كل الناس دي فرحانة على اللي انتي كتبتيه... على قد ما أنا حزينة جداً واتعكننت...
سيادتك قلبتي عليا المواجع...

أولاً لما ذكرتي اسمي ما افتكرتيش غير إني مرات علي... وده العادي بتاع الناس دلوقتي في عشرينات ... إني مجرد مرات علي...
كل تاريخي في عشرينات بينحصر في الكلمتين دول
تتصوري إني بعد عشرينات معنديش انتماء لأي حد...
اللي ينتمي لعشرينات بقلبه وروحه وعقله وطبعاً انتي أكتر واحدة عارفة كويس قد إيه أنا كنت ببقى محسوكة في التحديث والموضوعات والصور وقلبي قوي على الموقع وإزاي يطلع
عمري ما حبيت حد زي عشرينات

اللي ينتمي أوي لعشرينات ... عمره ما ينتمي لإسلام أون لاين بقلبه اوي كده... وماتقوليش إن الإتنين واحد...

ده أنا حتى نفسيتي اختلفت بعد الشغل معاهم... المهم ساعات الناس بتفتكر إني بحب عشرينات علشان الناس اللي فيه... محدش فاهم إني بحب الموقع نفسه... صفحاته... موضوعاته... مش مجرد زي ما بعض الناس الخنيقة بتقول ... بتحبيه علشان الريسة بتاعته صاحبتك والنائب جوزك:)))
يللا ما علينا... حيجي يوم واسمي ده حيتلغي من صفحات الأرشيف

زي ما جه عيد ميلاد عشرينات اللي فات ومجاش اسمي بتعريفة وحييجي اللي جاي واللي بعده واللي بعده

يا خسارة
باي باي يا عشرينات

dead man يقول...

كده برضه يا ست المديرة.. عالم أخر هو علشان ديد مان ولا ايه
:))

مش عارف اقولك غير ربنا يكرمك علي الكلام الحلو ده

rana 3amra يقول...

ليكى حق تفرحى بيه موقع يفرح بجد
مبروك يا قمر ع الافتتاح
انا كنت عايزة اسال هو ممكن اى حد ينشر تحقيقاته او مواضيعه اللى نفسه يعملها عندكم يعنى انا عارفة انكو مش فاتحينها سبيل بس انا بس بستفسر :)))))

أحمد القطب يقول...

كان من الصعب طبعاً تتكلمي عن أول واحدة في الفريق (الكَبيرة) اللي هي حضرتك.. شيرين مجدي طلعت حرب.

تعرفي ان اسمك أصلاً اسم فارسي.. انا قلت ادعبس عالمعنى الأصلي لقيته كالتالي:

«شيرين» والمعنى الأصلي للكلمة في الفارسية هو الحلوة.
- على موقع مجلة المعرفة

يالله يا سيتي أي خدمة..

وأنا بصراحة بأيدك في كل آرائك عن فريق عشرينات نااافاار نااافااار.. خصوصاً زينهم وعلي واحمد نصر.. بس باختلف معاكي فيما يتعلق بالمدعو أحمد قطب.. انت بصراحة اديتي للجدع ده أكتر من حقه بكتير.. انا شايف انه غلس ودمه يلطش.. وشايف نفسه مش عارف على ايه.. يالله اهو هايغور في..... وللا بلاش

ربنا يوفقك يا رب ويفرحنا بيكي زي ما فرحتينا بعلي ودعاء وسائر الضحايا اللي اتجوزا على إيدك.

غير معرف يقول...

هاشوف

غير معرف يقول...

ازيك ياشيرى .. بس وبرغم الكلام الحلو اوى اللى انت جمعانا فيه ده وغالى على .. بس حسبى شوية كده
عشان هاستغل البلوج بتاعك عشان ارد على مريومة الاول

"عارفة يامريومة انتى اول حد يقول الكلمة اللى جويا اوى انى عن نفسى مهما حصل مهما رحت مهما كانت علاقتى بالناس فىعشرينات مرتبطة اوى بالموقع ده بروحه الوانه كل حاجة فيه، وانا عن نفسى ياختى مش باربطك اول حاجة لعبى وبصراحة ولا بعشرينات لكن بقصص ماوراء الطبيعة، وانتى فى بالى دايما رائدة الصور والكليبات فى عشرينات، لو اعرفلك مدونة هانقل الكلام ده فيها"
..
شوية كده بقى يا مريم، شيرى بتهيألأى انتى نسيتى اكتر حاجة مشتركة بينى وبينك وهى ذوقنا فى الاغانى خاصة "اهوالك بلا امل" وربنا يستر))

واحنا يمكن مش قريبيين من بعض ورايحين جايين وساعات بنقفش على بعض ولا صراع الجبابرة بس ان اعارف اوى وزيك بالضبط الخيط اللى واضل بنا وربنا يديمه ويطلع قماش

ويارب اشوفك عروصة امورة وعندك عيال ملحوسين شيكولاتة

غير معرف يقول...

شكرا على الكوكتيل الجميل ده
وحاسس كدة كانه عامل زي كواليس الأفلام مين بيعمل اية ..

وبمناسبة الأفلام بقى.. عايز أقولك كدة على كام فيلم نمثلهم:

-وخز الضمير
-دستة مناديل
- عندما يسقط الجسد
-ارزاق يادنيا
- نور الدين والبحارة التلاته
- شهد الملكة
-غادة الصحراء

كفاية كدة أحسن شكلك وقعتي كتير في الأتوبيس..الكنبة اللي وراااا

ولو عايزة بقى بجد افيهات تموت يبقى لازم تتفرجي على فيلم "الشيطان يعظ".

وإلى اللقاء مع أفلام أخري..
دسككم محمد فاروق

عمرو غريب يقول...

لا بالفعل دة اعز الغالين

mohamed يقول...

انتطلاقة جميلة عجبني اوي وصفك للناس
وخصوا الطحاويز اكتر شخص اتعاملت معاه في عشرنيات

جميل جو الاسرة في البةج وفي الوقاع ربنا يدمه

واحد يقول...

كم أتمنى أن يكون تعليقي الأخير حتى يكون ختام المسك (نياهاهاهاها) لكني أعرف المغرضين أعداء النجاح والعظام الذين سيقترفون التعليق بعدي...سأقولها وأرحل إذن.. مبارك لك مشاهدتي مدونتك

سكوت هنصوت يقول...

شيرين

اول مرة اجيلك
واول مرة اسمع عن الموقع
بس عجبني اوي كلامك عن كل واحد
تسلم ايدك..و يا بختك انك تعرفي كل
الناس الحلوة دي..ده انتي اكيد غنية قوي
تحياتي

غير معرف يقول...
أزال أحد مشرفي المدونة هذا التعليق.
أحمد المصرى يقول...

السلام عليكم



أسعد الله قلوبكم فى زمن ندٌرت فيه القلوب النقية


تكتبى بتلقائة وسلاسة وهذا يدل على عمق الاحساس وروعته


دعواتى لكى ولهم ولكل من يبحث عن الخير بالصحة والعافية

وفقكم الله فى الحياة العملية كما أسعدكم فى الدراسية

غير معرف يقول...

انتي كاتبة رائعة وعذبة ورقيقة اين المزيد لماذا توقفتي