30 ديسمبر 2007

بموت في دباديبك !


سؤال أهبل قوي خطر على بالي انهارده الصبح.. ليه لما واحد بيحب واحدة قوي، أو العكس، بيقولها "بموت في دباديبك".. ويعني ايه دباديبك أصلا؟

هو ممكن تكون دباديب دي جمع دبدوب.. وعلشان كده الناس لما بيسيبوا بعض بيرجعوا الصور والجوابات والدباديب..

المشكلة الوحيدة في التفسير ده إن الكلمة دي من زمان، وزمان مكانش فيه دباديب

ياللا اللي عاوز يهيس وعنده تفسير يكتبه...

هناك 35 تعليقًا:

بنت امي الغالية يقول...

ههههههههههههههه
مسخرة بجد سؤال اكثر من مهيس
بصي يا سيدتي انا بوصفي ست فلاحة وكده يعني فهمت من الجملة دي ان الدباديب مرتبطة بشكل او باخر بالرجلين يعني بموت فيكي من اول راسك لحد صوابع رجليكي وهذا اصله ان الرجل هي التي تدب على الارض وكذالك الرجل تدب مطرح ما تحب وهكذا والله اعلى واعلم

غير معرف يقول...

على ما اذكر طوال سنوات عمرى كل و من كل اللى حبوني محدش استجرى يقولي بموت في دباديبك والله لو كان حد فكر يقولهالي كنت هنقض عليه و على دباديبه او الحل نستني لما حد يقولي الكلمة دي و استوقفه و اقله هي فين بقى دباديبي بالضبط اللى انت بتحبها
روزا ..معا ضد الدباديب

علي عبد المنعم يقول...

أنا أعتقد أن ده ليه علاقة بالدباديب الكائن الحيواني الشهير..

لكن مسألة إن الهدايا اختراع جديد.. قبل اختراع الدباديب فده ليه رد تاريخي يدحضه..

فبما أن شعراء الجاهلية زمان كانوا بيتغزلوا في الستات التخان وبيعتبروا إن ده هو مفهومهم للجمال الستاتي..

وبما إن عندنا أغنية كارتونية شهيرة اسمها: "دبدوبة التخينة"، فأعتقد أن اختراع هدية (الدباديب) كان تأثراً بهذا الاعتقاد التخين.. فكان الحبيب بيجيب دبدوب لحبيبته عشان يعبر لها إن نفسه إنها نبقى تخينة زي الدبدوب..

ومع مرور الزمن، أصبحت الهدايا الدباديب تخينة ورفيعة على حسب رؤيته للجمال الستاتي..

هذا تفسيري التآمري لهذا الأمر الجلل.. والله أعلم

غير معرف يقول...

الله هايل جدا العظمة دي يا ست الصحفيين والصحفيات والكاتبين والكاتبات والمؤلفين والمؤلفات بصراحة سؤال جوهري وعميق جداا وانا عمال اسال ايه اللي غاب عن مؤتمر انا بوليس ؟؟هو الدبدوب والدباديب ، صحيح طيب سؤال برده مهيس لما يكون المحب دبدودب زي حالاتي هيحب ازي ..؟؟
*نصيحة لشيرين :ياريت لا تنركي هذه الاسئلة المحورية العالم في حاجة برضه لقليل من التهييس عبد الله الطحاوي

battot يقول...

بصي يا بنتي ربنا يهديكي وتبطلي تهييس
انا اوعى على الكلمة دي من ساعة عمو مصطفى قمر ما غنى " ايا ناس انا موت في دباديبو دباديبووووووووو دباديبوووووووووووووووووو ..... الى اخر الاغنية "
عموما اعتقد والله اعلم بردو ان الدباديبو دي جزء من الوجه يعطي مظهر جمالى وأكيد دكاترة جراحة التجميل يقدروا يفيدونا في الموضوع ده
والمايك معاهم ...

Salma Amer يقول...

ممممممم
هو انا كنت ناقصة يا شري ان دماغي تتشغل بالمسألة الفلسفية الجامدة دي واضفها لكم من القضايا التي تشغل بالي

بس اعتقد ان زمان ناس كانت بتحب البنت المليانة شوية على اساس ان ده رمز انها متهنية في بيت اهلها وانها من علية القوم وكدة يعني
فهي كل ما بتمشي من كتر التخن طبعا بدب على الارض ويكون اتحورت مع زمن وبقت دباديبك مثلا
والله أعلم

Иεşċąfě &иεmö يقول...

تصوري يا شيري انه سؤال مهم جدا و محتلج تدقيق و تفحيص احنا فعلا بنردد الكلام من غير ما نفهم معناه بس يا سيتي علي العموم انا هركز جامد عشان اعمل دماغ و اهيس و احاول افهم معني الكلمه و سلملي علي الترماي بتاع شبرا الي اتشال من عقود

مصـ( الخير )ـعب يقول...

تساؤل فلسفي عميق..
لكن هناك تساؤل أكثر فلسفة.. أو أكثر عمقا .. أو يمكن الاتنين مع بعض..

هو ليه أصلا يعني لما نحب حد نقول "أنا بأموت فيه"

هل هناك ثمة علاقة بين الموت والحب؟!
أم أنها محض صدفة

تابعونا في الحلقة القادمة
من برنامجكم
من قلب "الأحباب"..

Cipher يقول...

زي ما مصطفى قمر قال اه يا ناس انا دوبت في دباديبو .. و انا قلبي مشعلل بلهيبو.. كنت لما بسمع الأغنية دي انا و مريم زمان كنا بنفتكر دباديبو بتاعة ماما سامية لحد ما كبرنا و عقلنا ..

فاروق يقول...

بص يا استاذة شيرين
بعد الفحص والمحص والتدقيق والتبحليق وصلنا للجواب الشافي في مسألة الدباديب..

دباديبك: تعني الحب والموت عشقا في تفاصيل الطرف الآخر يعني كل دبه أو حته فيه.

وهناك رواية أخرى - رواها صاحب مصنع شرابات من أم جنيه- أن الدباديب هي صوابع القدم، وبهذا يكون معنى اغنية مصطفى قمر "ياناس انا دوبت في دباديبو" أي عشقت في صوابع رجليك- ولا داعي لذكر أن قمر "معفن" بعد هذا الايضاح.

ويؤكد الرواية السابقة أن كاظم الساهر الذي أرسى قواعد الحب بالدباديب ، قد غنى فيما بعد رائعته "حافية القدمين"!!!!

أحمد رفعت يقول...

هي الكلمة ديه مصريه 100%
ليه بقه ؟؟ انا اقولك اصل 99% من ستات مصر اللى بيفضلوا حلوين قبل الجواز بعد الجواز بيببقوا شبة الدب المهم بعضهم بيتجاوز حجم الدب الواحد فواحد مرة قال لمراته بموت في دبايبك اي بموت فيكي كلك ولما كان كل قطعة فيها حجم الدب فاصبح كل حته فيها اسمها دبدوب ولما نأنث الدبدوب علشان الست المفروض انها انثى تبقى دباديب

عرفت اصل الكلمة

الموضوع محتاج مراجعة التاريخ ..


صباح التهيس

Cerebrosus world يقول...

عشان البنات في مصر معظمهم تخان :))

Mariam يقول...

وليه مايكونش الرجالة والولاد هما اللي تخان ومجعلصين ... أعتقد علشان الهدية الأولى دايماً من الحبيب بتكون دبدوب... احتمال
أما اللي بفكر فيه بجد يعني المسكين اللي معندوش دباديب ده يعمل إيه ... الواحد يحبه على إيه ويموت في إيه بالضبط؟!
فعلاً اشمعنى الدباديب؟؟؟
ما فيه أرانب وقرود وحتى فيران ... تخيله كده لو واحد قال لواحدة انا بموت في قرودك؟؟!
يعني هو الواحد لازم يمتلك حيوان أليف علشان يلاقي واحد يموت فيه وفي حيواناته؟؟

khalid complete يقول...

والدباديب هي كلمة ليس لها مفرد ولكنها تأتي جمع وهي كل ما يدب من كائنات والدليل على ذلك قول الشاعر المصري القديم " اللي كان بيقعد ورا الكاتب المصري القديم في الصورة إياها" الرجل تدب مطرح ما تحب ... وهي دي علاقة الحب بالدبدبة ومما سبق يتضح أن ... حسبي الله ونعم الوكيييييييييل هوه ايه الكلام ده ؟؟؟ انا أول مرة اتسأل السؤال المحرج ده عااااااااا
علشان خاطري لو عرفتي عرفييييني أحسن خطيبتي تسألني السؤال ده ومعرفش أجاوب

bagabigo يقول...

الدباديب حضرتك هى كعوب الرجل اللى بتدب على الأرض

زى الهوا يقول...

ياااااااااه اخيرا الشخص الصح جيه علشان يجاوب عبى السؤال اللى محيركم , الا وهوه انا , بصى بقى الدباديب اللى هيه الخدود الطخينة المكلبظة , علشان كدة الححبيب لما بيقول لحبيبته باموت فى دباديبك بيقرص على خدها اوى , اصلها هتفرح بيه لما يعورها ولا يطلعلها فسفوسة فى خدينها الناعمين ,

ياسلام عليا لما بألف , وفى النهاية باهنيكى على سؤالك الجامد اى سؤال يقف ادامك على طول ابقى اقصدينى

مروة الزارع يقول...

ههههههههههههههههههه

انتى عسللللللللللل

زمان اصلا متهيألى مكنش فية دباديب زى دلوقتى

كانوا بيهادوا بعض قمعين سكر وازاة شربات

هههههههههههههههه

غلب حمارى

دوحة يقول...

ههههههههههههه
معتقدش الدباديب المقصود بيها الدباديب ذاتها
ممكن هى تعبير
القصد منه بيموت فى كل حاجة بتخصها
حتى لو لبسها
حتى لو خاتمها بيحبه عشان هو بس بتاعها
والله اعلم طبعا يمكن الدباديب عشان بتدل على الرومانسية اتقالت والله اعلم
برضه
ده اجتهاد منى

الحلم العربي يقول...

هههههههههههه
بجد مش ممكن التحليل الرائع ده
بس هقولك يا ستى
فاكرة اغنية ويا ناس انا دبت في دباديبو بتاعت مصطفي قمر ....انا وقتهابقى ألح عليه نفس التساؤل و توجهت للكثيرين بالاستفسار عن المعنى الحقيقى للكلمة من المتخصصين و غير المتخصصين و في الآخر استخلصت خلاصة ألا و هي ان الدباديب هي كعوب الرجلين ....ييييييييييععععععععع
لذلك أنصح كل شاب و فتاه انهم يهتموا شوية بكعوب الرجلين لأنها مهضوم حقها خالص و أكيدمصطفي قمر و قتها كان متعاقد مع وزارة الصحة في حملة لتوعية الناس بأهمية كعوب الرجلين
مش بيقولوا " راحة الجسم تبدأ من القدمين" و كذلك فالحب يبدأ من الدباديب
و تحياتى للتهييس و للمهيسين و للى نفسهم يهيسوا و مش عارفين و انا و انت و دقى يا مزيكا

camellia يقول...

امممممممم
متهيالي انه ليه علاقة بالدبدبة
اللي هي صوت الخطوة علي الارض
ومن ناحية اخري فالواحد منا لا يقوم بالدبدبة عادة الا ان كان في حالة غضب أو نرفزة كفي الله الشر وعليه ..فقول القائل اموت في دباديبك يعني به انني اموت اذا غضبت مني او تنرفزت او تزرزرت-من الزرزرة- فمشيت بعيدا عني مدبدبا بحذائك ذي الكعب العالي
والله تعالي اعلي واعلم.

Soooo يقول...

قال الزمخشري .. الدباديب هي جمع دبدب
والدبدب هو كعب الغزال الشارد
والمراد من
انا بادوب في دباديبك .. اي ان قائل هذه العباره .. يعتصر قلبه ويذوب من دبدبة دبدب الغزال الشارد .. وهو الشخص المراد التحدث اليه

اما في البحتري فقد كان له رأي مخالف
اذ قال ان الدباديب هي الخدود المتورده للطفله الصغيره .. وبهذا فان الحبيب عندما يقول لمحبوبته انه يدوب في دباديبها .. أي انه يذوب شوقا وغراما ولهفة للطع بوسة على هذه الخدود


والله ولي التوفيق

ملحوظه
انتي جبتي السؤال ده منين؟؟؟؟؟



سلامووووووووووز

MĕŢø & ŘǿŖêĔ يقول...

هههههههههه
سؤال منطقي

هي كلمه غريبه فعلا وانا مش شايفه ان الدبدوب الو اي دخل بس هي كلمه زي اي كلام كتير منحكيه وتعودنا عليه بس هو شو معناها الله اعلم

روري

OMA يقول...

ده بمناسبه الفلانتين وغزو الدبايب الايام دي ولا ايه !!
اعتقد بحكم انهم بيحبوا الدبدوبه التخينه - اللي هم يقال انهم الرجال -
وده مايمنعش انها لما تتخن هيهروها تريقه ويتمسخروا عليها
بس لو تاخدي بالك ماحدش دلوقتي بقى يقولها
انتهى عهد الدباديب التخينه
وليه اصلا بموت في دباديبك....طب مايقولوا بحب دبادبيك
معقول بيغرموا بدباديبها لدرجه الموت !!!

صاحب المضيفة يقول...

تصدقي سؤال رايق بجد وعمر ما الواحد فكر فيه خالص

تفتكري ليه قالوا كده فعلا


مدونة جميلة ورقيقة

دمت بسعادة وهنا

سكــر يقول...

امممممممممممم
طب هدور فى القواميس

واسال عم جوجل

وادى دقنى لو انا عرفت النتيجه

هههههههه

تقبلى تحيتى

احمد سكر

حنة يقول...

بصي .. هي زي ما الزمخشري قال لك
بس عموما بانصح كل بنت خطيبها يقولها الكلمة دي تسيبه على طول(احنا جايين نهدي النفوس) لأنه غالبا كداب ومش عارف معناها وبيقولها اسطوانة محفوظة من زمان ... اوعي يا شيري يكون حد قال لك كده ... وهابي فلانتين

فيزو2000 يقول...

عن نفسى معنديش تفسير لهذة الكلمة المعقدة
ومحدش ساب لى فرصة فى ان حتى االف واو اراجع القاموس الحلمنتيشى , تعدد التفاسير والرب واحد .

الجمعاوي الاصيل يقول...

ههههههههههه لاتعليق

محمود على يقول...


الدبديب
المقصود بيها
دبة الرجل
بمعني ان كل دبة رجل ماشيه علي الارض
الحبيب بيحبها

غير معرف يقول...

ههههههههههه
انا جي متأخر
بتاع سنه وشوية
لكن هي كلمة 90% من شباب مصر بيقولها بنية مش سليمة والمقصود بيها هما دباديب البنت
ومش هينفع أوضح أكتر من كده عشان عيب :)

غير معرف يقول...

...بإعتباري أعرف قليل من العربية...حبيت السؤال وعاوز أشارك ..إتقالت العبارة دي ومش كان المقصود الحب والعبارة (بحبك وبموت في دباديبك)في رسالة..بحبك من حبك يحبك من الحبكة يعني..لأسباب يطول سردها..وهي خاصة...علي العموم أتمني الحب الصادق للكل والكل يموت فيي دباديب الآخر ..والدنيا تحلو.....وهي مفردة مصرية مية المية بصفاء النية...لكن شفتو إذاي التلاعب في الحبكة لأنها مكتوبة مش بالسمع بحبك بفتح الباء والمقصود ضمها ...

غير معرف يقول...

انت اموت في دبديبك

غير معرف يقول...

قال الزمخشري: الدباديب هي جمع دبدب، والدبدب هو كعب الغزال الشارد.
والمراد من:
أنا بادوب في دباديبك.. أي أن قائل هذه العبارة .. يعتصر قلبه ويذوب من دبدبة دبدب الغزال الشارد .. وهو الشخص المراد التحدث اليه

أما في البحتري فقد كان له رأي مخالف اذ قال: ان الدباديب هي الخدود المتوردة للطفلة الصغيرة..
وبهذا فان الحبيب عندما يقول لمحبوبته أنه يدوب في دباديبها .. أي أنه يذوب شوقا وغراما ولهفة للطع بوسة على هذه الخدود.

Dina M0122 يقول...

ما معنى ..... بموت في دباديبك ؟
قال الزمخشري: الدباديب هي جمع دبدب، والدبدب هو كعب الغزال الشارد.
والمراد من:
أنا بادوب في دباديبك.. أي أن قائل هذه العبارة .. يعتصر قلبه ويذوب من دبدبة دبدب الغزال الشارد .. وهو الشخص المراد التحدث اليه
أما في البحتري فقد كان له رأي مخالف اذ قال: ان الدباديب هي الخدود المتوردة للطفلة الصغيرة..
وبهذا فان الحبيب عندما يقول لمحبوبته أنه يدوب في دباديبها .. أي أنه يذوب شوقا وغراما ولهفة للطع بوسة على هذه الخدود.

Unknown يقول...

دباديبك معناها الشياء التي في جسد البشر والتي تكون +18